ဝိတ်မြန်မြန်တက်ချင်လား၊ ကိုယ့်ရဲ့ Diet Plan ကို ဒီလိုပြောင်းလိုက်ပါ
ယောက်ျားလေးပဲဖြစ်ဖြစ်၊ မိန်းကလေးပဲဖြစ်ဖြစ် ပိန်လွန်းရင်လည်း မကောင်းသလို၊ ဝလွန်းရင်လည်း ကျန်းမာရေးအတွက် ဘေးထွက်ဆိုးကျိုးများပါတယ်။
ကိုယ်က နဂိုပိန်တဲ့သူမို့လို့ ကိုယ်အလေးချိန်တက်အောင် Gym တွေကစားတယ်၊ အစားတွေလည်း စားပေမယ့် ထင်ထားသလောက် ဝိတ်မတက်ဘူးဆိုရင် ကိုယ့်ရဲ့ တစ်နေ့တာ စားသောက်မှုပုံစံကို ဒီလိုမျိုး ပြောင်းကြည့်သင့်ပါတယ်။
၁။ ပမာဏနည်းနည်းနဲ့ အကြိမ်ရေများများစားပေးပါ။ ကိုယ်က အကြောင်းအမျိုးမျိုးကြောင့် စားလိုက်တိုင်း ဝိတ်မတက်ဘူးဆိုရင်တောင် တစ်ကြိမ်တည်းမှာ ပမာဏအများကြီး စားလိုက်တာက ခန္ဓာကိုယ်အတွက်လည်း အာဟာရဓာတ်တွေ အကုန်မစုပ်ယူလိုက်နိုင်တာကြောင့် ဝမ်းဖြစ်ပြီး အဆီတိုးသွားတာပဲ အဖတ်တင်မှာပါ။ ဒါကြောင့် တစ်ရက်ကို ပမာဏနည်းနည်းနဲ့ အကြိမ်ရေများများ ခွဲစားပေးပါ။
၂။ အာဟာရပြည့်တာတွေကို များများစားပေးပါ။ ဝိတ်တက်ချင်လို့ အစားတော့ ပိုစားပေမယ့် ကိုယ်စားလိုက်တာတွေက အာဟာရမဖြစ်တဲ့ သွားရေစာတွေဆိုရင်တော့ အဆင်မပြေဘူးနော်။ ဒါကြောင့် ပရိုတင်းဓာတ်၊ ကစီဓာတ်၊ ကျန်းမာရေးနဲ့ ညီတဲ့အဆီဓာတ်တွေကို ရနိုင်တဲ့ အသား၊ ငါး၊ ပင်လယ်စာ၊ ဂျုံကြမ်းပေါင်မုန့်၊ ဥ၊ နို့ထွက်ပစ္စည်း၊ ပဲ၊ ထောပတ်သီး စတာတွေကို ပိုစားပေးပါ။
၃။ တစ်နေ့တာအတွက် ခန္ဓာကိုယ်က လိုအပ်တဲ့ အာဟာရဓာတ်တွေ လုံလောက်စွာရရှိနိုင်ဖို့၊ ကျန်းမာရေးကောင်းဖို့၊ ကိုယ်တွင်းအင်္ဂါတွေ ကောင်းစွာအလုပ်လုပ်နိုင်ဖို့နဲ့ ဇီဝကမ္မလျင်မြန်စွာ ဖြစ်ပျက်စေဖို့ အစာအုပ်စု စုံလင်အောင် စားပေးပါ။ အကယ်လို့ ကိုယ်မစားတဲ့၊ ကိုယ်နဲ့ဓာတ်မတည့်တဲ့ အစားအစာတွေရှိရင် ဖြည့်စွက်အားဆေးကို အစားထိုးသောက်ပေးပါ။
၄။ Gym ကစားသူတွေအတွက် သီးသန့် Mass gain ပရိုတင်းမှုန့်ကို လေ့ကျင့်ခန်းမလုပ်ခင်၊ လုပ်နေစဉ်နဲ့ လုပ်ပြီးသွားတဲ့အခါမှာ ပုံမှန်သောက်ပေးပါ။ ပရိုတင်းမှုန့်ဖျော်ရည်ကို တစ်ရက် ၁- ၃ ကြိမ်ထိ သောက်ပေးနိုင်သလို လေ့ကျင့်ခန်းမလုပ်တဲ့ရက်တွေမှာလည်း သောက်ပေးနိုင်ပါတယ်။
ဖြည့်စွက်အနေနဲ့ ရေများများသောက်ပေးဖို့၊ အိပ်ရေးဝအောင် အိပ်စက်အနားယူဖို့ လေ့ကျင့်ခန်းပုံမှန်လုပ်ပေးဖို့နဲ့ အလေးမလေ့ကျင့်ခန်းတွေကို များများလုပ်ပေးခြင်းက ဝိတ်မြန်မြန်တက်အောင် ကူညီပေးနိုင်ပါတယ်။
အကယ်လို့ ကိုယ်က စားသောက်နေထိုင်မှုပုံစံကို ဂရုစိုက်နေပေမယ့် ကိုယ်အလေးချိန်က ကျမြဲတိုင်း ကျနေမယ်ဆိုရင်တော့ ကျန်းမာရေးစစ်ဆေးမှုခံယူဖို့ အကြံပေးလိုက်ပါတယ်။
ရဲမျိုးမြတ်